Muli મૂળી

મૂળી દર્શન-સૌરાષ્ટ્રમાં સુરેન્દ્રનગરથી 22 કી.મી. ના અંતરે મૂળી ગામ આવેલું છે. અહીં ત્રણ શિખરનું આથમણા બારનું વિશાળ મંદિર શ્રીજી મહારાજની આજ્ઞાથી સદગુરુ શ્રી બ્રહ્માનંદ સ્વામીએ બંધાવ્યું છે. આ મંદિરની જમીન મૂળી સ્ટેટના રાજા રામભાઇ દરબારે મંદિર બાંધવા સારુ કૃષ્ણાર્પણ કરેલી છે. અહીંના રામાભાઇ રાજાની ભક્તિને વશ થઇ શ્રીહરિએ સંવત 1879 ના મહા સુદી પાંચમને રોજ શ્રી રાધાકૃષ્ણ હરિકૃષ્ણ મહારાજ વિગેરે દેવોની પ્રતિષ્ઠા ઓરડામાં સ્વહસ્તે કરેલી હતી. શ્રી બ્રહ્માનંદ સ્વામીએ ત્યાર પછી તે ઓરડાના સ્થાને જ શ્રીજી મહારાજની આજ્ઞાથી વિશાળ મંદિર બંધાવેલ છે. મંદિરથી દક્ષિણ બાજુએ વિશાળ સભામંડપ છે. સભામંડપમાં એક ભાગમાં શ્રી ઘનશ્યામ મહારાજની કાષ્ઠની ઉભી મૂર્તિ રહેલી છે. મંદિરની વાયવ્ય કોણમાં એક લીંબડો અને કુવો પ્રસાદીના છે.
મંદિરના દરવાજા બહાર સામેના ભાગમાં અલર્ક નામની પ્રાચીન વાવ આવેલી છે. તેમાં શ્રીહરીએ સ્નાન કરેલું છે. આ વાવ ઉપર શ્રીહરિએ માનસીપૂજા કરવાનો બોધ સત્સંગિજનોને આપેલો છે. આ વાવ દત્તાત્રેય ભગવાનના શિષ્ય બનેલા અલર્ક રાજાએ બંધાવેલી છે. અહીં તે રાજાએ આશ્રમ બાંધીને તપશ્ચર્યા કરેલી. મંદિરની પશ્ચિમ દિશામાં ભોગાવો નામની નદી છે તેમાં શ્રીજી મહારાજ અને સંતોએ અનેક વાર સ્નાન કરેલ છે.
ગામમાં પરમાર ક્ષત્રિઓના કુળદેવતા માર્તંડરાય(સૂર્ય) નું શિખરબંધ મંદિર છે. આ મદિરમાં શ્રીજી મહારાજ પધારેલા છે. ત્યાં પથ્થરનો હાથી છે તે પ્રસાદીનો છે.
ગામથી પશ્ચિમ દિશામાં આઠેક કી.મી. દૂર પત્થરની ખાણ છે. આ ખાણ શ્રીજી મહારાજે દિવ્યરુપે દર્શન આપી બતાવેલી, તેમાંથી પત્થર કાઢી સ્વામીએ મંદિર બંધાવેલ છે. પત્થરો કાઢતાં મજુરોને પાણી જોઇએ તે માટે શ્રીજીએ ભરવાડના વેશે સ્વામીને ખાણની નજીકમાં વાવ બતાવેલી. આ ખાણ ઉપર હનુમાનજીની દેરી છે.

અહીં સ્વામિનારાયણ મંદિરમા ઉતારાની અને જમવાની સંપૂર્ણ વ્યવસ્થા છે.


નકશામાં મૂળી જોવા માટે અહીં ક્લીક કરો